Oktyabrın 1-dən hərbi qulluqçuların pul təminatı artırılacaq

Oktyabrın 1-dən hərbi qulluqçuların pul təminatının artırılması nəzərdə tutulur. Bu məqsədlə dövlət büdcəsindən əlavə 50 milyon manat vəsait ayrılacaq. Bu barədə Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov məlumat verib.
Deputatın sözlərinə görə, artımın məbləği hərbi qulluqçuların tutduqları vəzifəyə və hərbi rütbələrinə uyğun olaraq müəyyən ediləcək və onların sosial müdafiəsinin daha da yaxşılaşdırılmasına xidmət edəcək.

"Hərbi qulluqçuların maaşlarının artırılması 2026-cı ildə müxtəlif sahələrdə həyata keçirilən əməkhaqqı artımları seriyasının davamı kimi qiymətləndirilir. Əvvəllər tibb işçilərinin maaşları artırılmışdı. Bundan əlavə, bu ilin yazında imzalanmış sərəncamla dövlət qulluqçularının pul təminatı artırılıb", — deyə V.Bayramov qeyd edib.

Komitə üzvü dəqiqləşdirib ki, cari büdcə imkanları, eləcə də 2027-ci ilin dövlət büdcəsi layihəsi gələn il də əməkhaqqı artımlarının davam etdirilməsi üçün resursların mövcudluğundan xəbər verir.
Ekspertin sözlərinə görə, 2027-ci ildə sosial istiqamətlərə 17 milyard manatdan çox vəsaitin ayrılması planlaşdırılır. Bu isə sosial ödənişlərin və əməkhaqlarının artımının gələn il də mərhələli şəkildə davam etdirilməsinə imkan yaradacaq.